Cole gekk til liðs við Roma frá Chelsea síðasta sumar en lék aðeins sextán leiki með liðinu á síðustu leiktíð.

Hann gerði tveggja ára samning við ítalska félagið og á því ár eftir af samningi.

Rudi Garcia, stjóri Roma, reyndi að losna við Cole í sumar en án árangurs. Roma keypti Lucas Digne til að spila vinstri bakvarðarstöðuna og nokkuð ljóst að tækifæri þessa 34 ára fyrrum enska landsliðsmanns verða af skornum skammti.

Cole er til að mynda ekki í Meistaradeildarhópi Roma, hefur ekki verið í leikmannahópi liðsins í fyrstu tveim deildarleikjunum og fékk ekki númer fyrir tímabilið. Þá er hann ekki skráður á leikmannalista á heimasíðu félagsins.

Newcastle sýndi áhuga á Cole á lokadegi félagaskiptagluggans en samkvæmt ítölskum miðlum hafnaði kappinn öllum viðræðum.