Ólafur Ingi Skúlason, miðjumaður íslenska landsliðsins, kom inn á sem varamaður í stórkostlegum 1-0 sigri gegn Hollandi í Amsterdam í undankeppni EM í kvöld.
Ólafur Ingi var ekki valinn í upphaflegan hóp en kom inn á vegna meiðsla Emils Hallfreðssonar. Skyndilega var hann svo kominn inn á völlinn undir lokin.
„Það er bara æðislegt að fá að taka þátt í þessu, þetta er frábær sigur. Maður var ekki í upprunalega hópnum þannig það var extra plús að fá að hoppa inn á," sagði Ólafur Ingi við Fótbolta.net.
„Mér fannst þeir ógna voða lítið, auðvitað hjálpaði þegar þeir fá mann út af en mér fannst við bara spila þetta gríðarlega vel, við vorum ekki að taka neina sénsa eða gefa þeim óþarfa skyndisóknir eða spila þetta upp í hendurnar á þeim. Við byrjum seinni hálfleik gríðarlega vel og fáum víti og skorum og erum svo bara solid. Þeir eiga nokkur skotfæri eins og búast má við en Hannes gerði vel."
Viðtalið má sjá hér að ofan.
Athugasemdir