Þróttarar hafa ekki unnið leik á þessu ári en þeir tóku þátt bæði í Fótbolta.net mótinu og Reykjavíkurmótinu. Gregg hefur engar áhyggjur af því.

„Við náum aldrei góðum úrslitum í janúar, febrúar, mars og apríl og allir afskrifa okkur. Það er í góðu lagi. Við fáum engin stig fyrir að vinna leiki núna. Þetta snýst allt um maí og við munum toppa þá."

Þróttarar eru ekki hættir á leikmannamarkaðinum en þeir ætla að styrkja sig meira fyrir sumarið.

„Oddur Björnsson sleit krossband og við þurfum að fá mann í hans stað á miðjuna. Við erum ennþá að skoða vinstri bakverði. Við þurfum að styrkja okkur fyrir Pepsi-deildina. Við fáum að minnsta kosti tvo leikmenn. Við viljum fá íslenska leikmenn, við viljum hafa eins marga Íslendinga og við getum en ef það gengur ekki þá skoðum við aðra möguleika eins og við höfum gert með Thiago."

Markvörðurinn Arnar Darri Pétursson kom til Þróttar frá Stjörnunni í vikunni. Hann mun berjast við Trausta Sigurbjörnsson um markvarðar stöðuna.

„Hann kemur til að ná í markvarðastöðuna. Hann vill berjast og vera númer eitt. Hann er mjög góður og reyndur markvörður. Við sjáum hvernig þetta þróast," sagði Gregg.

Hér að ofan má sjá viðtalið í heild sinni.