Börsungar tefldu fram sínu sterkasta liði þegar þeir heimsóttu Villarreal í undanúrslitum spænska Konungsbikarsins í kvöld, þrátt fyrir að hafa unnið fyrri leikinn 3-1 á heimavelli.

Neymar kom Börsungum yfir strax á þriðju mínútu leiksins og svöruðu heimamenn með nokkrum hættulegum sóknum, án þess að jafna fyrr en Jonathan dos Santos kom knettinum í netið rétt fyrir leikhlé.

Villarreal lét skotum rigna á Marc-Andre ter Stegen en þau voru flest auðveld meðhöndlunar. Miðjumaðurinn Tomas Pina var rekinn af velli um miðjan síðari hálfleik og það auðveldaði hlutina fyrir Börsunga sem komust yfir skömmu síðar, með marki frá Luis Suarez.

Neymar gerði svo fjórða mark leiksins og gulltryggði öruggan sigur á útivelli og samanlagðan 6-2 sigur í undanúrslitum bikarsins. Barcelona mætir annað hvort Athletic Bilbao eða nágrönnum sínum í Espanyol í úrslitaleiknum.