„Stefnan er sett á að vinna alla leiki sem við förum í hvort sem það er í bikar eða deild. Byrja af krafti og verða enn betri með hverjum leik sem líður. Svo tökum við stöðuna á þvi hvar við stöndum þegar mótið er búið. Þór er auðvitað mjög stórt félag með háleit markmið. Þetta verður frábært fótboltasumar og við Þórsarar hlökkum til að
taka á móti fínum liðum hérna í Þorpinu."

Þórsarar miklir höfðingjar
Donni tók við Þórsurum síðastliðið haust af Páli Viðari Gíslasyni. „Að mínu mati hefur gengið mjög vel að komast inn í nýtt starf. Þórsarar eru miklir höfðingjar og auðvelt að falla inn í frábært félag. Strákarnir er mjög metnaðarfullir og hafa staðið sig mjög vel i að meðtaka nýjar áherslur," sagði Donni en hann er ánægður með veturinn.

„Undirbúningstimabilið hefur gengið mjög vel. Leikmenn hafa æft vel og lagt mikla vinnu á sig. Margir leikmenn hafa fengið dýrmæta reynslu í Lengjubikarnum, þó vissulega hefðum við viljað vinna alla leiki sem við fórum í. En það hefur verið stigandi í leik liðsins, þó nokkuð af áherslubreytingum sem tekur tima að venjast en ég er sannfærður um að þetta muni smella á réttum tíma."

„Við notuðum æfingaferðina mjög vel og öll púslin í leikmannamálum eru að koma saman. Þetta verður allt klárt þegar mótið byrjar og það skiptir mestu máli."

Ánægður með hópinn
Þórsarar hafa fengið nokkra nýja leikmenn í vetur en Donni reiknar ekki með frekari liðsstyrk fyrir mót.

„Við Þórsarar erum mjög ánægðir með hópinn okkar eins og er. En maður veit aldrei, ef flottir spilarar vilja spila i sterku liði þá tökum við stöðuna á þvi. Síðan eigum við frábæra unga leikmenn bæði í öðrum og þriðja flokki sem við myndum gjarnan vilja gefa reynslu. Þar eru strákar sem geta náð langt og við bindum miklar vonir við," sagði Donni.