Hjörtur Hermannsson, varnarmaður PSV og íslenska U21 landsliðsins, er spenntur fyrir stórleiknum gegn Frakklandi í undankeppni EM 2017.
Ísland byrjaði undankeppnina með glæstum 3-0 sigri gegn Makedóníu en mætir nú stjörnum prýddu liði Frakklands klukkan 14:00 á morgun á Kópavogsvelli.
Ísland byrjaði undankeppnina með glæstum 3-0 sigri gegn Makedóníu en mætir nú stjörnum prýddu liði Frakklands klukkan 14:00 á morgun á Kópavogsvelli.
„Við erum búnir að eiga góðar æfingar saman fram að þessu og erum bara spenntir fyrir komandi verkefni. Við komum fullir sjálfstrausts í þennan leik og ætlum að ná í góð úrslit," sagði Hjörtur við Fótbolta.net.
„Strákarnir í A-landsliðinu eru búnir að sýna það og margir eins og ég sjálfur eru komnir með þrjá leiki gegn Frökkum og hafa ekki ennþá tapað. Það er engin ástæða til þess að vera hræddur við þessa stráka, við höfum spilað við þá áður og ekki tapað og við ætlum að halda því áfram, jafnvel gera ennþá betur."
Hjörtur lenti í löngum og erfiðum meiðslum á síðasta tímabili og var frá í marga mánuði. Hann er hins vegar allur að koma til.
„Ég er allur kominn til baka, ég er búinn að æfa í tvo mánuði af kappi og er kominn með nokkra leiki í lappirnar, en er ekki ennþá kominn með 90 mínúturnar. Við stefnum kannski á að ná því hérna, ég er í toppstandi og mér líður vel," sagði Hjörtur að lokum.
Athugasemdir