Liverpool heimsótti Bournemouth í fyrri leik dagsins í ensku úrvalsdeildinni og þurfti Liverpool á sigri að halda til að endurheimta annað sæti deildarinnar.

Sadio Mane kom Liverpool yfir á 20.mínútu eftir frábæra sendingu frá Emre Can. Nokkrum andartökum síðar nýtti Divock Origi sér hræðilegt úthlaup Artur Boruc og kom Liverpool í 2-0. Þannig stóðu leikar í leikhléi.

Bournemouth voru ekki tilbúnir að gefast upp því á 56.mínútu minnkaði Callum Wilson muninn með marki úr vítaspyrnu sem dæmd var á James Milner.

Emre Can svaraði að bragði fyrir Liverpool og héldu eflaust margir að þar með væri Liverpool að tryggja sér sigur.

Heimamenn voru ekki á sama máli því þeir jöfnuðu metin með tveim mörkum á þriggja mínútna kafla.

Lokamínúturnar voru æsispennandi og heimamenn náðu inn sigurmarki á þriðju mínútu uppbótartíma þegar Nathan Ake fylgdi á eftir skoti Steve Cook en setja má spurningamerki við markvörslu Loris Karius í aðdragandanum.

Hreint ótrúlegur endurkomusigur Bournemouth staðreynd og mistókst Liverpool því að endurheimta annað sætið.