Ítalíumeistarar Juventus náðu að leggja Evrópumeistara Real Madrid 2-1 í fyrri viðureign liðanna í undanúrslitum Meistaradeildarinnar í Tórínó.

Juventus byrjaði leikinn af krafti og það bar ávöxt á áttundu mínútu þegar Alvaro Morata sem skoraði af stuttu færi og sleppti því að fagna gegn sínu fyrrum félagi.

Á 27. mínútu jafnaði Cristiano Ronaldo af stuttu færi með skalla eftir undirbúning James Rodriguez. Mark númer 76 hjá Ronaldo í Meistaradeildinni sem er met.

Eitt mark var skorað í seinni hálfleik en það gerði Carlos Tevez úr vítaspyrnu. Tevez skaut á mitt markið en hann hafði krækt í vítið sjálfur eftir að Dani Carvajal hafði réttilega verið dæmdur brotlegur.

Liðin mætast í seinni leiknum í Madrídarborg á miðvikudaginn í næstu viku.