Portúgalski knattspyrnustjórinn Andre Villas-Boas hefur verið dæmdur í sex leikja bann í rússnesku úrvalsdeildinni.
Villas-Boas stýrir ríkjandi meisturum í Zenit St.Pétursborg en liðið hefur farið frekar rólega af stað í deildinni og tapað tveim af fyrstu sjö leikjum sínum.
Villas-Boas fékk rautt spjald um síðustu helgi þegar liðið tapaði á heimavelli fyrir Krylya Sovetov og hefur verið dæmdur í þetta langa leikbann vegna viðbragða sinna við rauða spjaldinu.
Hann er sakaður um að hafa ýtt harkalega við fjórða dómara leiksins en atvikið náðist ekki á myndband.
Þessi fyrrum stjóri Tottenham, Chelsea og Porto á að hafa beðist afsökunar á athæfinu en hann mun nú þurfa að sitja upp í stúku í deildarleikjum liðsins þar til í lok október.
Athugasemdir