Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
   mið 06. maí 2015 09:30
Magnús Már Einarsson
Viðar Jónsson: Búðingar munu flykkjast á Búðagrundina
Viðar Jónsson (til hægri).
Viðar Jónsson (til hægri).
Mynd: Leiknir Fáskrúðsfirði
Mynd: Jóhanna Hauksdóttir
„Vissulega kemur spáin á óvart. Við erum nýliðar og eigum eftir að sanna okkur í deildinni. Vissulega höfum við spilað ágætlega í vetur og spiluðum í undanúrslitum Lengjubikarsins en það telur lítið í Íslandsmótinu," segir Viðar Jónsson þjálfari Leiknis frá Fáskrúðsfirði en liðinu er spáð 4. sæti í 2. deildinni í sumar.

Leiknismenn komust upp úr 3. deildinni í fyrra en Fáskrúðsfirðingar voru í baráttu við Hött um sigur í deildinni allt fram í lokaumferð.

„Markmið okkar er fyrst og fremst að festa okkur í sessi í deildinni, skemmta fólkinu okkar á Fáskrúðsfirði og njóta þess að spila knattspyrnu. Við förum að sjálfsögðu í alla leiki til að vinna og svo sjáum við til hvað það skilar okkur að lokum."

30 ár síðan Leiknir F. var í sambærilegri deild
Tæplega 700 manns búa á Fáskrúðsfirði og mikil spenna er þar fyrir komandi fótboltasumri.

„Það er mjög mikll áhugi á knattspyrnu hér og ekki síst eftir árangurinn síðasta sumar. Það eru allir að drepast úr spenningi enda um 30 ár síðan Leiknir F. var að spila í sambærilegri deild. Búðingar munu flykkjast á Búðagrundina í sumar, ekki spurning."

Leiknir fór í undanúrslit í B-deild Lengjubikarsins þar sem liðið þurfti að lúta í lægra haldi gegn Aftureldingu.

„Það jákvæða við undirbúningstímabilið er að við höfum spilað hátt í 15 leiki eftir áramót sem þykir gott á okkar mælikvarða . Eins hef ég haft flest alla drengina hér fyrir austan. Vertíðin hefur alltaf einhver áhrif en hver þarf ekki að vinna," sagði Viðar sem býst ekki við frekari liðsstyrk fyrir mót. „Nei ekki eins og staðan er núna. Ég er mjög sáttur við hópinn við bíðum spenntir eftir fyrsta leik gegn Stólunum næstu helgi."

Deildin verður jöfn
2. deildin hefst á laugardag og Viðar reiknar með spennandi baráttu í sumar.

„Ég held að deildin verði jöfn. Held að liðin reiti stig hvert af öðru og ekki hægt að segja neitt fyrir víst. Miðað við undirbúningstímabilið eru einhverjir líklegri en aðrir. ÍR, Afturelding, Njarðavík, og Sindri verða klárlega í baráttunni. Svo má ekki gleyma Hattarmönnum en þeir verða ansi öflugir í sumar," sagði Viðar að lokum.
Athugasemdir
banner
banner