Miðjumaðurinn Oliver Sigurjónsson er enn að glíma við erfið meiðsli en hann gekk í raðir norska liðsins Bodö/Glimt frá Breiðabliki í júlí síðastliðnum. Hann gat ekki spilað mikið á sínu fyrsta tímabili með norska liðinu en það vann B-deildina með yfirburðum og leikur í úrvalsdeildinni í ár.
„Ég náði ekkert að spila með liðinu af viti þegar ég meiddist í náranum í september og þannig er staðan enn á mér. Ég er enn meiddur í náranum og þetta er helvítis djöfull að ætla að koma og sanna sig, gera eitthvað af viti, og svo segir nárinn nei," sagði Oliver í útvarpsþættinum Fótbolti.net á X977 í gær.
Óvissa er með meiðsli Olivers og ekki ljóst hvenær hann verður klár í slaginn á ný.
„Það veit eiginlega enginn nákvæmlega hvað þetta er. Þetta er eitthvað bak við nárann og það er enn meira pirrandi að vera í þessari óvissu."
Hann hefur ekkert getað æft fótbolta og hans vinna hefur því verið í ræktinni. Hann segir það skiljanlega taka á andlega.
„Þetta er drullusvekkjandi þegar maður vill sanna sig. Svo er líka landsliðsverkefni núna í janúar, sem B-landsliðið er í, auðvitað langar manni að taka þátt í því. Það er því miður ekki allt hægt í þessu," segir Oliver.
Oliver segist bjartsýnn þrátt fyrir þessu erfiðu meiðsli og segist finna fyrir því að þjálfarar liðsins hafi trú á sér og tilbúnir að sýna sér þolinmæði.
Hlustaðu á viðtalið í heild sinni í spilaranum hér að ofan eða í gegnum Podcast forrit.
Athugasemdir