Dregið var í undanúrslit Borgunarbikars karla í dag. Valur heimsækir KA og KR fær ÍBV í heimsókn. Við heyrðum í Sigurbirni Hreiðarssyni, aðstoðarþjálfara Vals, eftir dráttinn en leikur KA og Vals verður í lok mánaðarins.
„Mér lýst mjög vel á þetta verkefni. Þetta verður gríðarlega erfitt verkefni en gaman að fara á Akureyrarvöll. KA-menn hafa verið mjög skipulagðir í keppninni og gríðarlega erfitt að spila á móti þeim, sérstaklega fyrir norðan," segir Sigurbjörn.
„Við þurfum að eiga okkar allra besta leik og allir á tánum ef við ætlum áfram úr þessum leik. Menn þrá að komast á Laugardalsvöllinn."
Það er líklegt að Valur flytji heimaleiki sína á Laugardalsvöll í ágúst þar sem stefnan er sett á að setja gervigras á heimavöll liðsins á Hlíðarenda.
„Það er ekki útséð með neitt enn, ég tjái mig ekkert um það fyrr en það er komið á hreint. Við viljum allavega vera hérna í úrslitaleik."
Sigurbjörn er fyrrum þjálfari Hauka sem leika sína heimaleiki á gervigrasi. Hvernig finnst honum áætlanir Vals að flytjast alfarið á gervigras?
„Það eru kostir og gallar í þessu. Það verður þá að vera mjög gott gervigras. Gervigrasið í Hafnarfirði er ekkert sérstakt og ekki hægt að bera það saman við alvöru gervigras," segir Sigurbjörn en viðtalið má sjá í heild sinni í spilaranum hér að ofan. Þar er einnig talað um næsta leik Vals sem er deildarleikur gegn Stjörnunni á föstudag.
Athugasemdir