Ólafur Ingi Skúlason gekk í sumar til liðs við tyrkneska félagið Gençlerbirliği og hann hefur lent í ýmsum ævintýrum á fyrstu mánuðum sínum þar.
„Það er gaman að prófa þetta. Þetta er öðruvísi en maður er vanur og góð reynsla," sagði Ólafur Ingi við Fótbotla.net í dag.
„Tyrkir eru mjög ástríðufullir þegar kemur að knattspyrnu og maður fann fyrir því á Twitter eftir Besiktas leikinn. Það eru allskonar læti í mönnum þegar eitthvað kemur upp."
Dómararnir á Tyrklandi hafa verið talsvert í sviðsljósinu á þessu tímabili. „Þeir eru búnir að vera ansi slakir. Það eru dómaraskandalar og læti í mönunm í nánast öllum leikjum. Það er svolítið spes. Þeir eru að dæma rangstöðu úr innköstum og skrýtna hluti. Þetta er sérstakt en maður verður bara að taka því."
„Deildin er fín en það er nánast tómt á öllum leikjum. Það er eitthvað nýtt miðasystem og við vorum bara með 2000 manns á síðasta leik. Það er ýmislegt sem er skrýtið. Svo lengi sem deildin er góð og það er fullt af góðum leikmönnum þá einbeitir maður sér að því að spila fótbolta."
Ísland mætir Tyrklandi í lokaleiknum í undankeppni EM í næstu viku. Tyrkir eru að berjast um að ná sæti á EM og mikil spenna er fyrir leiknum þar í landi. „Ég held að allt Tyrkland fylgist með. Þetta er risastórt land og fótbolti er númer 1, 2 og 3 þannig að það má búast við að það verði mikil stemning,"
Ólafur Ingi er að berjast um sæti í íslenska landsliðshópnum fyrir EM á næsta ári en hann hefur verið inn og út úr landsliðshópnum.
„Maður verður að gera eins vel og maður getur í sínu félagsliði og sýna og sanna þegar maður kemur hinagð að maður eigi heima í þessum hóp. Maður þarf að halda þétt á spöðunum," sagði Ólafur Ingi.
Sjá einnig:
Athugasemdir