Leiknir mætti Val í úrslitaleik Reykjavíkurmótsins annað árið í röð. Í fyrra hafði Valur betur en í kvöld höfðu Leiknismenn betur og unnu öruggan 4-1 sigur.

Leikurinn var jafn til að byrja með og komust Valsarar yfir með marki úr vítaspyrnu frá Kristni Frey Sigurðssyni. Eiríkur Ingi Magnússon braut þá á Daða Bergssyni sem var kominn einn í gegn, en Eiríkur fékk ekki spjald.

Leiknismenn tóku stjórn á leiknum og jafnaði Elvar Páll Sigurðsson leikinn skömmu áður en Ingvar Ásbjörn Ingvarsson kom Leikni yfir.

Valsarar komust tvívegis nálægt því að jafna fyrir leikhlé en Leiknismenn komust í 3-1 snemma í síðari hálfleik þegar Ingvar Ásbjörn gerði sitt annað mark. Ingvar fékk boltann fyrir utan vítateig og sneri honum glæsilega í markvinkilinn.

Sindri Björnsson innsiglaði svo sigur Leiknis með marki úr vítaspyrnu á 74. mínútu og komust bæði lið nálægt því að bæta marki við en inn vildi boltinn ekki og er Leiknir Reykjavíkurmeistari árið 2016.

Skoðaðu textalýsingu frá leiknum