Jasmín Erla Ingadóttir, leikmaður Vals, var flutt með sjúkrabíl upp á spítala eftir að hafa lent í óheppilegu atviki í 2-1 sigri liðsins á Keflavík á HS Orku-vellinum í kvöld.
Lestu um leikinn: Keflavík 1 - 2 Valur
Susanna Joy Friedrichs reyndi sendingu frá miðlínu en boltinn rataði í andlitið Jasmínar Erlu af stuttu færi.
Jasmín virtist ætla að hrista þetta af sér en nokkrum mínútum síðar fann hún fyrir mikilli ógleði og var skipt af velli.
„Já, hún þurfti að fara upp á spítala og mér skilst að hún sé frá í einhverjar vikur,“ sagði Pétur Pétursson, þjálfari Vals, við Fótbolta.net í kvöld.
Þegar gengið var til búningsherbergja kastaði Jasmín upp og vissi ekki hvar hún væri stödd og því sendi með sjúkrabíl upp á spítala í frekari rannsóknir.
Eins og Pétur kom inn á þá verður Jasmín líklegast frá næstu vikur en þessi öfluga fótboltakona hefur skorað 3 mörk í fjórum leikjum sínum með Val í Bestu deildinni í ár.
Athugasemdir
