Guðlaugur Baldursson, aðstoðarþjálfari FH, segir fagnaðarefni að félagið hafi náð að krækja í miðvörðinn Bergsvein Ólafsson frá Fjölni. KR-ingar voru einnig að reyna að fá leikmanninn sem valdi FH fram yfir.
„Bergsveinn er góður leikmaður og frábær karakter, hann hefur staðið sig vel síðustu ár í Fjölni. Við höfum litið til þessa leikmanns, hann stóð sig mjög vel í sumar og vakti verðskuldaða athygli. Við tókum eftir honum eins og eflaust fleiri og erum virkilega ánægðir með að hafa fengið hann til okkar," segir Guðlaugur.
Fleiri frétta er að vænta úr herbúðum FH.
„Við skoðum í kringum okkur og skoðum hvað við viljum gera. Þetta verða ekki síðustu tilkynningarnar frá okkur fyrir næsta tímabil. Það er alveg klárt."
Kassim Doumbia og Brynjar Ásgeir Guðmundsson eru að verða samningslausir og hafa ekki skrifað undir nýja samninga. Guðlaugur segir að viðræður séu í gangi við þá og vonast til að halda þeim.
Viðtalið má sjá í sjónvarpinu hér að ofan.
Sjá einnig:
Viðtal við Bergsvein Ólafsson
Athugasemdir