Undankeppni EM byrjar aftur að rúlla í kvöld þar sem átta leikir eru á dagskrá.

Það er mikil spenna í D-riðli þar sem heimsmeistarar Þjóðverja verma toppsætið með nítján stig. Þeir sækja Írland heim í dag en Írar eru í 3.sæti með fimmtán stig.

Pólland er með tveim stigum minna en Þýskaland í 2.sæti en þeir heimsækja Skota í kvöld þar sem Skotlandi dugir ekkert minna en þrjú stig ef liðið ætlar sér að eiga möguleika á farseðli til Frakklands.

Ungverjar mega ekki misstíga sig gegn Færeyjum í kvöld í F-riðli þar sem liðið er að elta Rúmeníu og N-Írland sem eru í efstu tveim sætunum.

Í I-riðli leikur Danmörk sinn síðasta leik í kvöld þegar liðið heimsækir Cristiano Ronaldo og félaga í Portúgal sem eru á toppi riðilsins með fimmtán stig eftir sex leiki. Danir hafa leikið einum leik meira og hafa tólf stig í öðru sæti en í þriðja sæti eru Albanir með ellefu stig eftir sex leiki.