West Ham sló út Liverpool á dramatískan hátt í enska bikarnum í kvöld eftir framlengdan leik.

Leikurinn var sekúndum frá því að fara í vítaspyrnukeppni þegar Angelo Ogbonna skoraði með skalla á 120. mínútu.

Michail Antonio hafði komið West Ham yfir rétt fyrir leikhlé en strax í upphafi seinni hálfleiks jafnaði Philippe Coutinho metin. Coutinho var að spila sinn fyrsta byrjunarliðsleik í meira en mánuð en hann hefur glímt við meiðsli.

Inn á fyrir Coutinho kom síðan Daniel Sturridge á 59. mínútu, en meiðsli hafa einnig sett mikið strik í reikninginn hjá honum. Hins vegar urðu ekki skoruð fleiri mörk í venjulegum leiktíma.

Líkt og áður sagði kom Ogbonna svo í veg fyrir vítaspyrnukeppni á lokaandartökunum og West Ham mætir því Blackburn í 16-liða úrslitunum á meðan lærisveinar Jurgen Klopp eru úr leik.