Valur sigraði Grindavík 4-2 í úrslitaleik Lengjubikarsins í kvöld í fjörugum leik.

Sigurbjörn Hreiðarsson þjálfari Vals var sáttur með leik sinna manna og hafði aldrei miklar áhyggjur af því að tapa þessum leik.

„Mér fannst við vera búnir að vera mun betri aðilinn í leiknum og fannst við vera með þetta en þegar þeir minnka muninn í 2-1 þá er nátturulega eitt mark bara eitt mark og bara ein sókn fyrir andstæðinginn. Auðvitað er maður smá smeykur þá en mér fannst við spila leikinn heilt yfir mjög vel. Mér fannst þetta heilt yfir mjög sanngjarnt."

Kristinn Freyr Sigurðsson var ekki með Völsurum í dag en Bjössi sagði að hann væri tæpur og þeir vildu ekki taka neina sénsa en hann ætti að vera klár í fyrsta leik í Pepsí-deildinni.

„Við erum ekkert að hætta á það þegar menn eru ekki alveg klárir að þeir séu að spila leik, sérstaklega ekki í undirbúningi fyrir mót, en hann verður kominn fyrr en varir."

Valur er komið með gríðarlega sterkan leikmannahóp og aðspurður sagði Bjössi að ekkert sérstakt væri í kortunum á leikmannamarkaðnum en þeir eru þó með augun opin ef eitthvað gott býðst.

„Maður veit aldrei, ef einhver frábær leikmaður býðst þá veit maður aldrei eins og maður segir, ég veit ekki um neitt lið sem lokar bara öllu."

Valsmenn hafa verið að spila á tveim leikkerfum, í dag spiluðu þeir 3-5-2 en Bjössi sagði að þeir gætu vonandi keyrt á báðum kerfum í sumar.

„Við höfum spilað 4-3-3 og gert það vel og gerðum það mest megnis í fyrra og við höfum verið að vinna aðeins með 3-5-2 og getum vonandi beitt báðum kerfum. Við erum að gera þetta til að eiga möguleika á fleiri varientum, það er bara þannig og svo sjáum við bara til við hverja við erum að spila og hvað hentar best."