Chelsea hefur náð að klifra upp í sjöunda sæti ensku úrvalsdeildarinnar sem gæti gefið þátttökurétt í Evrópukeppni. Liðið er aðeins tveimur stigum á eftir Newcastle sem er í sjötta sæti.

Boehly var sakaður um að gera félagið að aðhlátursefni en Bandaríkjamaðurinn segir að áætlanir séu farnar að bera ávöxt.

„Við höfum spilað fallegan fótbolta í síðustu leikjum. Flæðið var svo gott og þetta var alveg eins og við viljum sjá liðið spila. Hlutirnir eru að falla saman hjá okkur og það hefur sést í síðustu leikjum," sagði Boehly á íþróttaráðstefnu í Los Angeles í gær.

Framtíð Pochettino hefur verið talsvert í umræðunni en næsti leikur Chelsea er gegn Nottingham Forest á laugardag, áður en liðið ferðast til Brighton og tekur á móti Bournemouth í lokaumferðinni.