„Liverpool var líka að kynna nýjan þjálfara í dag. Ætli við höfum ekki það markmið að komast í Evrópukeppni á undan Liverpool," sagði Bjarni léttur í bragði.

„Ég vonast eftir skemmtilegum árum hérna. Það er kraftur í peyjunum hérna og ég hlakka til."

Bjarni er mjög reyndur þjálfari en hann hefur meðal annars einnig stýrt KA, Stjörnunni, Fylki og Grindavík hér á landi auk þess sem hann var aðstoðarþjálfari íslenska landsliðsins um tíma.

„Hann þekkir okkar og hann þekkir samfélagið. Það er allt til alls til að koma á góðu og farsælu samstarfi," sagði Ingi Sigurðsson í stjórn knattspyrnudeildar á fréttamannafundinum í dag.

„Hann hefur gífurlega reynslu og er búinn að upplifa allt í knattspyrnuheiminum á Íslandi. Það er ánægjulegt fyrir okkur að endurnýja kynnin við hann."

ÍBV endaði í 10. sæti í Pepsi-deildinni í sumar en í Eyjum ætla menn að spýta í lófana og gera mun betur á næstu árum.

„Það er táknrænt að skrifa undir í flugstöðinni í Eyjum. ÍBV hefur verið í kjallaranum í efstu deild undanfarið en nú er kominn tími á að taka á flug og komast hærra í deildinni. Það er skýrt markmið að koma ÍBV mun hærra á næsta tímabili. Bjarni hefur fengið þau skilaboð frá stjórninni og við erum tilbúnir í slaginn," sagði Ingi.

„Við vonumst til að mynda öflugan leikmannahóp á næstu vikum og byggja upp framtíðar. Við viljum ekki byggja upp lið fyrir eitt keppnistímabil í einu heldur til lengri tíma."

Viðtal við Bjarna Jóhannsson kemur hér á Fótbolta.net síðar í dag.