Lestu um leikinn: Ísland 2 -  0 Kosóvó

Gylfi Þór Sigurðsson og Jóhann Berg Guðmundsson sáu til þess að Ísland myndi vinna Kósóvó með mörkum sínum og kláraði Ísland riðilinn í efsta sæti.

„EM var sætt, þetta er sætara og stærra. Það er erfitt að koma þessu í orð," sagði Alfreð.

„Skiljanlega var fyrsti hálftíminn ekkert sérstakur, vorum ekki alveg að finna hvort við ættum að pressa eða liggja á þá. Það var í raun og veru engin hætta nema þetta langskot hjá þeim."

„Við vitum að þeir eru ekki að tapa neitt stórt, orðið í kvöld var þolinmæði."

„Það komast þrettán lið frá Evrópu á HM, 24 á Evrópumótið. Þetta er rugl."

„Það er komin ótrúlega mikil reynsla í þetta lið, vorum í umspilinu fyrir fjórum árum og það gaf okkur ótrúlega mikið. Spennustigið þar var hátt og við stóðumst það próf ekki. Við tókum það með okkur og kláruðum EM, þegar menn eru komnir með smjörþefinn af stórmóti þá vill maður gera þetta á tveggja ára fresti."

Þegar Alfreð var spurður um óskamótherja þá kom raunverulega bara eitt lið til greina en það er Bandaríkin. Aron Jóhannsson ákvað að leika fyrir bandaríska landsliðið og vill Alfreð ólmur mæta vini sínum.

„Ég var ekki alveg kominn svo langt. Það væri gaman að fá einhver skemmtileg lið annað en Evrópuþjóðir. Eigum við ekki bara að segja Bandaríkin," sagði hann í lokin.