„Mér hefur nánast aldrei liðið svona vel. Þetta er eins og draumur sé að rætast,“ sagði landsliðsmarkvörðurinn Hannes Halldórsson eftir 2-0 sigur Íslands á Kósóvó. Risasigur sem tryggir Íslandi sæti á Heimsmeistaramótinu í Rússlandi næsta sumar.
Íslenska liðið fann sig ekki nógu vel í fyrri hálfleik og Hannesi létti mjög þegar Gylfi Sigurðsson náði að brjóta ísinn.
Íslenska liðið fann sig ekki nógu vel í fyrri hálfleik og Hannesi létti mjög þegar Gylfi Sigurðsson náði að brjóta ísinn.
Lestu um leikinn: Ísland 2 - 0 Kosóvó
„Það var svakalegur léttir. Mér fannst við ekki góðir á löngum köflum. Í fyrri hálfleik vorum við ekki sjálfum okkur líkir. Þegar kom loksins mark losnaði aðeins um þetta. Það var fáránlegur léttir.“
Það var lítið að gera hjá Hannesi í leiknum og það getur verið erfitt fyrir markmenn að spila slíka leiki. Hannes beið þolinmóður eftir fyrsta markinu, vitandi að leikmennirnir fyrir framan hann eru alltaf líklegir til að skora á heimavelli.
„Ég var svolítið eins og áhorfendur uppi í stúku. Maður gat ekki mikið annað gert en að vona að þetta myndi smella hjá okkur en maður á bara að læra að treysta þessum gaurum. Þeir enda alltaf á að koma honum í markið. Við erum með það mikið af flinkum gaurum að við skorum alltaf hérna á heimavelli.“
Aðspurður um tilfinningarnar sem spruttu fram eftir lokaflautið átti Hannes erfitt með að svara.
„Það var eins og það hefðu brostið einhverjar flóðgáttir. Svo kom flugeldasýning þarna og þetta var ævintýri líkast. Það er náttúrulega algjörlega lygilegt að við séum komnir í þessa stöðu,“ sagði markvörðurinn meðal annars en hægt er að horfa á allt viðtalið við hann í spilaranum hér að ofan.
Athugasemdir