Guðni Bergsson, formaður KSÍ, er mættur til Færeyja til að fylgjast með leik Íslands og Færeyja í undankeppni HM kvenna en flautað var til leiks klukkan 16:00. Leikurinn fer fram á Þórsvelli sem er glæsilegur gervigrasvöllur í Færeyjum. Guðni er búinn að skoða hann vel.
„Það er mikill metnaður í þessu verkefni. Þeir ætla að endurbyggja stúku hérna og þá er þetta þéttur og góður völlur sem tekur 5000 manns. Þeir eru að gera þetta vel finnst mér," sagði Guðni við Fótbolta.net í Færeyjum í dag.
„Það er góð aðstaða fyrir áhorfendur og hér eru líka skrifstofur og fleira. Þeir hafa gert þetta að fagmennsku. Þeir hafa sýnt okkur ýmislegt sem þeir eru að gera vel og færeyskur fótbolti er á góðum stað."
Færeyska úrvalsdeildin hófst í mars en þar er spiluð þreföld umferð í tíu liða deild, samtals 27 leikir. Gæti Ísland fjölgað gervigrasvöllum og byrjað mótið á slíku undirlagi?
„Einhverjir hafa velt því fyrir sér að hafa þrefalda umferð og það má velta því fyrir sér og jafnvel prófa sig eitthvað áfram. Ég er af þeirri kynslóð að ég er hrifinn af náttúrulegu grasi en gervigrasið býður upp á annars konar og meiri nýtingu og auðvitað á það vel við íslenskar aðstæður að mörgu leyti. Við erum með góða blöndu af náttúrulegu og gervigrasi eins og er en ég á von á því að við eigum eftir að sjá fleiri keppnisvelli með gevigrasi á Íslandi."
Hér að ofan má sjá viðtalið í heild sinni.
Athugasemdir