10 af 11 leikmönnum í líklegu byrjunarliði Tryggva mynduðu byrjunarliðið á EM í Frakklandi í fyrra. Eina breytingin er að Alfreð Finnbogason kemur inn fyrir Kolbein Sigþórsson sem er meiddur.

„Það er ákveðið traust á byrjunarliðið sem hefur alltaf verið. Þetta byrjunarlið er gefins finnst mér," sagði Tryggvi en er einhver leikmaður sem gerir tilkall í liðið fyrir utan þá leikmenn sem hann velur í liðið?

„Aron Sigurðar gæti gert tilkall en hann er líka jóker sem gæti komið inn með hraða og tækni og gert eitthvað síðasta korterið."

Ísland er í 2. sæti í riðlinum eftir fyrri umferðina á meðan Króatar sitja á toppnum.

„Við erum á heimavelli og þetta er lið sem okkur hefur dauðlangað að vinna lengi. Við eigum harma að hefna og ég veit að það er hugur í strákunum að taka Króatana. Við erum á fínum stað í riðlinum og sigur myndi koma okkur á mjög góðan stað."