Heimild: Morgunblaðið
Telur sig eiga heima í EM-hópnum
Það vakti athygli á dögunum þegar varnarmaðurinn Sölvi Geir Ottesen færði sig um set í Kína og fór til Wuhan Zall sem leikur í B-deildinni þar í landi. Sölvi varð bikarmeistari með Jiangsu Suning í fyrra en félagið hefur gert miklar breytingar og skipt algjörlega um erlenda leikmenn.
Þrátt fyrir að vera að stíga skref niður telur Sölvi sig eiga heima í landsliðshópnum sem fer á EM í Frakklandi í sumar.
„Ég geri mér grein fyrir því að standardinn í þessari deild er ekki eins góður og í úrvalsdeildinni en stefna félagsins er skýr. Það ætlar að ná árangri og vinna sér sæti í deild þeirra bestu," segir Sölvi í viðtali við Morgunblaðið í morgun.
Sölvi er 31 árs gamall og hefur leikið alls 28 leiki fyrir A-landsliðið.
„Það er klárlega markmiðið að komast í lokahópinn. Ég hugsaði aðeins út í það þegar ég samdi við Wuhan Zall hvort það gæti haft áhrif á landsliðið. Ég komst að þeirri niðurstöðu að ég yrði ekkert lélegri leikmaður eftir þrjá mánuði. Mér finnst ég eiga heima í þeim hópi sem fer til Frakklands þó svo að ég sé kominn í B-deildina hér í Kína."
„Menn hafa spilað í næstefstu deild í Noregi og víðar og komist í landsliðið. Þeir Lars og Heimir vita hvað ég get," segir Sölvi við Morgunblaðið en hann hefur verið varamaður fyrir Kára Árnason og Ragnar Sigurðsson sem mynda miðvarðapar Íslands númer eitt.
Athugasemdir