Hjá Barcelona kemur Coutinho til með að fylla skarð Neymar, en hver mun fylla skarð Coutinho þegar hann fer frá Liverpool.

Squawka ákvað að taka saman lista yfir fimm raunhæfa kosti.

Hér að neðan eru þeir.

Hakim Ziyech
Félag: Ajax
Aldur: 24 ára

Er með svipaða eiginleika og galla og Coutinho var með hér áður fyrr, áður en hann varð að þeim leikstjórnanda sem hann er fyrir Liverpool í dag. Liverpool getur hjálpað Ziyech að bæta sig.

Ziyech á það til að reyna of mikið og að skjóta of mikið.

Hins vegar, þegar allt gengur upp hjá honum þá er gríðarlega gaman að horfa á hann. Hann er með gott ímyndunarafl og er góður tæknilega. Hann getur skorað mörk og lagt upp fyrir aðra.

Lykiltölfræði: Skapaði flest færi í hollensku úrvalsdeildinni og í Evrópudeildinni á síðasta tímabili.



Jean Michel Seri
Félag: Nice
Aldur: 26 ára

Spilar oftast sem djúpur miðjumaður, en hann er góður sóknarlega líka. Getur leikið á varnarmenn og komið baneitraðar sendingar.

Coutinho átti væntanlega að leika sem djúpur miðjumaður á þessu tímabili, með það markmið að nota hraðann sem Mohamed Salah og Sadio Mane hafa úti á köntunum.

Seri er nú þegar í því hlutverki hjá Nice og myndi því líklega smellpassa inn í liðið hjá Liverpool.

Seri er fáanlegur fyrir 40 milljónir evra, en Liverpool þarf að bregðast fljótt við, Barcelona hefur líka áhuga!

Lykiltölfræði: Seri átti 31 sendingu í gegnum varnir andstæðinga á síðasta tímabili, aðeins fimm í Evrópu áttu fleiri þannig sendingar - Sanchez, Messi, Di Maria, Tolisso og De Bruyne.



Manuel Lanzini
Félag: West Ham
Aldur: 24 ára

Hefur nú þegar fyllt í skarð Dimitri Payet hjá West Ham. Hann gæti fengið enn stærra verkefni hjá Liverpool.

Lanzini er vinnusamur, góður á boltann og skorar mörk. Hann er hins vegar ekki með reynslu úr Meistaradeildinni og ekki eins mikil stjarna og Coutinho er. Hann myndi ekki selja eins margar treyjur.

Liverpool myndi koma út í miklum gróða ef þeir myndu selja Coutinho til Barcelona og kaupa síðan Lanzini frá West Ham.

Lykiltölfræði: Lanzini hefur skorað 14 mörk hjá West Ham á fyrstu tveimur tímabilum sínum í ensku úrvalsdeildinni, meira en nokkur annar miðjumaður hjá félaginu.



Rafinha
Félag: Barcelona
Aldur: 24 ára

Barcelona þarf að koma jafnvægi á hópinn hjá sér. Þeir gætu því losað sig við leikmenn með óljósa framtíð. Rafinha er einn þeirra.

Hann virðist ekki geta fest sig í einni stöðu hjá Barcelona. Hann spilaði m.a. í stöðu vængbakvarðar á síðasta tímabili.

Barcleona gæti reynt að freista Liverpool með því að bjóða Rafinha sem hluta af kaupverðinu fyrir Coutinho.

Góður og fjölhæfur miðjumaður sem þarf að fá tækifæri.

Lykiltölfræði: Rafinha var í fimmta sæti yfir flest unnin einvígi yfir 90 mínútur í La Liga á síðasta tímabili .



Riyad Mahrez
Félag: Leicester
Aldur: 26 ára

Ef Liverpool vill hafa skapandi leikmann á kantinum þá er Mahrez mjög áhugaverður kostur.

Var magnaður þegar Leicester vann ensku úrvalsdeildina og gæti smellpassað inn í hlutverkið sem Coutinho hefur haft hjá Liverpool.

Liverpool er líka að fara að taka þátt í Meistaradeildinn og hann, Mahrez gæti hjálpað við að auka breiddina fram á við.

Lykiltölfræði: Aðeins þrír leikmenn hafa tekið fleiri leikmenn á í ensku úrvalsdeildinni síðastliðin tvö tímabil - þessir leikmenn eru Wilfried Zaha, Eden Hazard og Alexis Sanchez.