„Það verður að vera gaman að þessu, við erum búnir að vera lengi saman þannig að það er kominn smá galsi í menn. Það er gaman að þessu," sagði Alfreð við Fótbolta.net.

„Þetta er bara eins og best er á kosið fyrir okkur að þurfa ekki að millilenda og geta æft í gærmorgun. Það er eðlilegt að það sé smá þreyta í morgunsárið og vonandi verðum við bara ferskir þegar flautan gellur."

Vilja allir vera í byrjunarliðinu í Frakklandi
Alfreð segir að tyrkneska liðið sem Ísland mætir annað kvöld sé allt annað lið en tapaði 3-0 á Laugardalsvelli fyrir ári síðan. Býst hann við erfiðum leik en segir jafnframt að íslenska liðið ætli sér að gera góða hluti.

„Það var mikið taktleysi í þeirra liði þá og þeir voru kannski ekki alveg búnir að púsla saman því liði sem þeir vildu. Í síðustu leikjum eru þeir mjög sterkir og eru náttúrulega í 3. sæti í þessum sterka riðli. Það er allt annað að sjá liðið þannig þetta er hættulegt lið að spila við," sagði Alfreð.

„Við reynum að fókusa minna á það sem þeir þurfa, við förum í þennan leik til að vinna. Við erum strax byrjaðir að undirbúa okkur fyrir EM og þar ætlum við að vinna leiki, þannig við ætlum að fókusa það."

„Þetta er alltaf landsleikur, við erum að spila fyrir Ísland og það vilja allir vera í byrjunarliðinu í Frakklandi og komast sem næst því."

Alfreð fékk tækifæri í byrjunarliðinu í 2-2 jafnteflinu gegn Lettlandi á dögunum og náði að valda varnarmönnunum talsverðum vandræðum í fyrri hálfleik.

„Ég var allavega ánægður með leikinn og þjálfararnir líka og það er það sem skiptir mestu máli fyrir mig. Svo er spurning hvaða lið þarf í þessum leik, kannski þarf eitthvað annað en mína kosti eða einhvers annars. Maður sér bara hvað þjálfararnir ákveða, ég treysti þeim fullkomlega til að velja liðið. Ég er alltaf klár, það er bara þannig," sagði Alfreð.