„Það var ekki mikill munur á liðunum," sagði Gylfi Þór Sigurðsson eftir 2-0 tapið gegn Króötum í kvöld. „Mér fannst við spila ágætlega miðað við aðstæður. Það voru ekki mikil gæði í þessum leik, þetta voru tvö jöfn lið, en munurinn er að þeir skoruðu tvö mörk."
Gylfi átti tvívegis góða spretti sem enduðu með skoti en í bæði skipti komust varnarmenn Króata fyrir.
„Það var erfitt að breyta um stefnu á vellinum og ég vissi ekki alveg hvar markið var. Ég ætlaði að læða honum í nærhornið. Í seinni hálfleik reyndi ég að fara í fjærhornið en hann blokkaði hann þetta með kálfanum eða lærinu. Þetta hefði getað dottið á öðrum degi en svona er fótboltinn. Við þurfum að vinna þá núna á heimavelli."
Gylfi spilaði í fremstu víglínu í dag en ekki á miðjunni líkt og vanalega. „Það var allt í lagi. Heimir lét mig vita nokkuð snemma í vikunni hvað hann var að hugsa. Hann vildi hafa aukamann á miðjunni til að reyna að stoppa þeirra spil. Það var ekki mikið um spil á vellinum. Það var erfitt að gefa boltann og taka við honum."
„Ég fékk meira af hálffærum í þessum leik og var að reyna að vinna seinni boltann þegar Jón Daði var að flikka honum. Venjulega búum við til fleiri færi í gegnum sendingar og hreyfingu en það vantaði herslumuninn í dag."
Íslenska liðið er núna með sjö stig eftir fjórar umferðir í I-riðli. „Þetta er erfiður riðill og það eru margir að taka stig af hvor öðrum. Eina svekkelsið er jafnteflið í Úkraínu þar sem við áttum fullt af tækifærum. Leikurinn í dag var öðruvísi og jafnari. Þetta er samt ágætis byrjun. Þetta minnir svolítið á undankeppnina fyrir EM. Þá unnum við fyrstu þrjá leikina og töpuðum síðan úti gegn Tékklandi. Við getum vonandi lært af þeim riðli og gert sömu hluti sem eftir er af mótinu."
Hér að ofan má sjá viðtalið í heild sinni.
Athugasemdir