Undur og stórmerki áttu sér stað í spænska boltanum í kvöld þegar Valencia vann loksins fótboltaleik.

Eftir markalausan fyrri hálfleik kom Oscar Duarte gestunum í Espanyol yfir snemma í síðari hálfleik og hefur eflaust farið um Gary Neville, stjóra Valencia.

Hann brá þá á það ráð að setja Alvaro Negredo inn af bekknum og það skilaði sér því Negredo jafnaði metin á 71.mínútu. Denis Cheryshev, lánsmaður frá Real Madrid tryggði svo Valencia langþráðan sigur með marki á 76.mínútu.

Fyrsti sigur Valencia í deildinni síðan þann 7.nóvember síðastliðinn og um leið fyrsti deildarsigur liðsins undir stjórn Neville.

Valencia því komið í 11.sæti deildarinnar en Espanyol er í 17.sæti, einu stigi fyrir ofan fallsvæðið.