Witsel kom til Kína frá Zenit í Pétursborg.
Kínverski landsliðsmaðurinn Qin Sheng hjá Shanghai Shenhua er í vondum málum en eigandi félagsins Wu Xiaohui er bandbrjálaður eftir að hann traðkaði viljandi á mótherja sínum, belgíska landsliðsmanninum Axel Witsel hjá Tianjin Quanjian.
Sheng fékk rauða spjaldið frá dómaranum en eigandinn hefur bætt hressilega ofan á þá refsingu.
Sheng fékk væna sekt, var færður niður í varaliðið og mun verða lækkaður í launum. Þá var honum skipað að senda frá sér opinbera afsökunarbeiðni.
Eigandinn tók sterkt til orða við fjölmiðla og sagði að leikmaðurinn hefði skaðað ímynd félagsins og fótboltans í landinu.
„Fyrir leikinn vorum við búnir að vara Qin Sheng við því að hann þyrfti að bæta hegðun sína inni á vellinum. Viðvaranir okkar komu þó ekki í veg fyrir að þetta gerðist," sagði eigandinn.
Axel Witsel er ein skærasta stjarna kínversku deildarinnar en hann náði að hrista af sér sársaukann eftir traðkið og skoraði í leiknum sem endaði með jafntefli.
Athugasemdir
