Varnarleikur Víkings hefur verið flottur. Sölvi Geir Ottesen, fyrrum landsliðsmiðvörður, kom inn í lið Víkings fyrir síðasta leik og stóð sig alveg prýðilega.

„Hann hefur skilað okkur miklu. Við vorum að vísu án hans í fyrsta leiknum og héldum hreinu þá líka, en hann kom mjög vel inn í síðasta leik og er okkur afar þýðingarmikill."

„Í fyrra var sagt um okkur að við værum sálarlausir og við þyrftum sterkan persónuleika. Þess vegna lagði ég mikla áherslu á það að fá hann. Hann er gríðarlegur fengur fyrir okkur."

Markmannsmálin
Markmannsmál Víkinga hafa verið lyginni líkast. Á undirbúningstímabilinu varð það ljóst að Róbert Örn Óskarsson myndi líklega ekki spila mikið í sumar. Þá var Aris Vaporakis fenginn á láni frá Helsingor.

En hann meiddist, fékk höfuðhögg gegn Val. Emil Andri Auðunsson spilaði seinni hálfleikinn gegn Íslandsmeisturunum en í markið núna er kominn danski markvörðurinn Andreas Larsen. Hann kemur til félagsins frá Lyngby í Danmörku.

„Að lokum tókst að ná honum," segir Logi um Andreas sem kom með Víkingi í æfingaferð til Tyrklands í vor, en ekki gat orðið af félagaskiptum vegna meiðsla markmanna hjá Lyngby BK á þeim tímapunkti.

„Í ofánlag við það að Aris meiðist og fær heilahristing og allt það, þá puttabrotnar Emil á æfingu í gær. Á síðustu mínútu æfingarinnar í gær þá er skot á markið og hann stendur með puttann úr liði og er að auki brotinn. Það var mjög þýðingarmikið að fá Andreas."

„Ég hef sagt það í gamni að ég væri markvörður, þá myndi ég aldrei skrifa undir hjá þessu félagi."

Verið er að vinna í því að ganga frá félagskiptum við senegalska markvörðinn Serigne Mor Mbaye og gæti Víkingur endað með þrjá nýja markverði eftir alla þessa ringulreið.

Eru ekki hræddir við gervigrasið
Næsti leikur Víkinga er gegn Stjörnunni á útivelli á morgun. Logi segir að þetta sé ekki draumatími til að mæta Garðbæingum, sem eru með eitt stig eftir fyrstu tvo leiki sína.

„Þeir hafa spilað á köflum mjög vel í þessum fyrstu leikjum, ég hef séð þá báða. Þetta er enginn draumatími að hitta Stjörnuna á þessum tímapunkti þar sem þeir hafa ekki náð þeirri niðurstöðu sem þeir vildu í þessum leikjum," sagði Logi.

„Þetta verður spennandi og erfitt."

Fyrstu tveir leikir Víkings hafa farið fram á erfiðum Víkingsvelli í Fossvoginum. Nú fara piltarnir hans Loga á teppið í Garðabæ.

„Það snúast allir um leikir, sama hvernig aðstæðurnar eru, um vinnslu. Þú getur ekki mætt bara og rúllað boltanum á milli án þess að leggja vinnu á þig."

„Við erum ekki óvanir að spila á Gervigrasi, það er ekkert sem hræðir okkur."

Hlusta má á viðtalið í heild sinni en þar ræðir Logi nánar um Pepsi-deildina og hvernig hún hefur farið af stað.