Topplið ensku úrvalsdeildarinnar, Manchester City, heimsótti Liverpool á Anfield í síðari leik dagsins í enska boltanum. City burstaði fyrri leik liðanna og var fyrir leikinn taplaust á toppi deildarinnar.

Liverpool byrjaði leikinn betur því Alex Oxlade-Chamberlain kom heimamönnum yfir snemma leiks með föstu skoti utan teigs.

Mohamed Salah komst nálægt því að tvöfalda forystu Liverpool skömmu síðar en Egyptinn náði ekki að koma skoti á markið eftir góðan sprett.

Heimamenn héldu forystunni allt þar til á 40.mínútu þegar Þjóðverjinn Leroy Sane fann leið framhjá landa sínum, Loris Karius sem kom engum vörnum við föstu skoti Sane í nærhornið.

Staðan í leikhléi því jöfn.

Heimamenn voru miklu öflugri í upphafi síðari hálfleiks og það skilaði marki eftir tæplega klukkutíma leik þegar Roberto Firmino tók John Stones í bakaríið og kláraði færið sitt af stakri snilld.

Nokkrum sekúndum síðar var Liverpool aftur komið í stórsókn. Fyrst átti Sadio Mane hörkuskot í stöngina en honum brást ekki bogalistin tæpri mínútu síðar þegar hann þrumaði boltanum í netið eftir frábæran undirbúning Salah og staðan skyndilega orðin 3-1 fyrir heimamönnum.

Toppliðið átti engin svör við sóknarleik Liverpool og Salah kórónaði frábæra frammistöðu sína með snilldarmarki á 67.mínútu.

Bernardo Silva kom inn af bekknum hjá gestunum og náði að klóra í bakkann á 83.mínútu og bjó til smá spennu fyrir lokamínúturnar.

Ilkay Gundogan minnkaði svo muninn enn frekar á lokamínútu venjulegs leiktíma en nær komst toppliðið ekki og fyrsta tap Man City í ensku úrvalsdeildinni í vetur staðreynd.

Man City eftir sem áður í efsta sæti deildarinnar en Liverpool situr nú við hlið Man Utd og Chelsea í 2-4.sæti deildarinnar. Öll liðin fimmtán stigum á eftir City.