Markvörðurinn Bruno Fernandes var í dag kynntur sem nýr leikmaður Boa Esporte sem leikur í brasilísku B-deildinni. Endurkoma hans í fótboltann hefur skapað mikla reiði í Brasilíu.
Árið 2013 var Bruno, sem er fyrrum fyrirliði Flamengo í Brasilíu, dæmdur í 22 ára fangelsi fyrir að myrða kærustu sína. Konan hét Eliza Samudio og var 25 ára gömul en saman áttu þau son.
Samuido var pyntuð áður en hún var myrt, líkið var svo bútað niður af Bruno og gefið rottweiler hundunum hans.
Bruno var nýlega látinn laus úr fangelsinu en þegar hann tilkynnti að hann ætlaði að snúa aftur í fótboltann urðu viðbrögðin í samfélaginu hörð.
Fjölskylda Samudio hefur lýst yfir reiði sinni og hópar hafa staðið fyrir mótmælum. Þrír styrktaraðilar Boa Esporte riftu samningum sínum við félagið eftir að koma Bruno var staðfest og tölvuárás var gerð á heimasíðu félagsins.
Spurningar voru af skornum skammti á fréttamannafundinum í dag þegar Bruno var kynntur til leiks en hann sagði að guð myndi vísa sér rétta leið.
Athugasemdir