,,Áhorfendur hljóta að hafa fengið eitthvað fyrir sinn snúð," sagði Guðrún Jóna Kristjánsdóttir þjálfari FH eftir 5-3 tap gegn Val á Hlíðarenda en FH komst í 2-0 í leiknum.
,,Þetta var hörkuleikur og örugglega mjög skemmtilegt að horfa á. Mikil læti og mörg mörk. Ég er drullufúl með að tapa hérna."
FH komst í 2-0 eftir hálftíma leik, en það kom Guðrúnu Jónu ekkert á óvart.
,,Nei, alls ekki. Við lögðum þetta vel upp og vorum að spila frábærlega fyrstu 35 mínúturnar. Svo komast þær inn í leikinn og ég er mjög ósátt við þriðja markið þar sem mér fannst brotið á mínum varnarmanni og svo er algjörlega fáránlegt víti sem var dæmt. Svo vorum við að reyna að jafna í lokin."
,,við ætluðum að vinna hérna og töldum okkur geta gert það. Ég er samt sátt með framlag stelpnanna þær voru að leggja sig virkilega í þetta. Flott að skora þrjú mörk en að sama skapi ekki gott að fá á sig fimm mörk og það er eitthvað sem við þurfum að bæta. Við sýndum hvernig við getum spilað og erum flott lið en það er svekkjandi að mér fannst einn ákveðinn maður svolítið skemma leikinn," sagði Guðrún Jóna sem var ósátt við Óla Njál dómara.
,,Ég var ekkert sátt við hann í dag, en kannski dæmdi hann á báða bóga en ég er mjög ósátt við þriðja markið og vítið," hélt hún áfram en Óli Njáll gaf henni áminningu fyrir að skammast í sér.
,,Maður lifir sig bara inn í leikinn, það væri skrítið ef maður myndi ekki lifa sig inn í þetta og stundum segir maður eitthvað sem maður á ekki að segja. En þeir verða að þola sína gagnrýni eins og við."
