Jón Daði Böðvarsson var tekinn í viðtal fyrir ferðalagið og sagði frá hjólatúr landsliðsins um borgina.

„Það var fínt að skoða bæinn aðeins. Ég hef ekki hjólað síðan ég var ellefu ára þannig þetta var bara gaman. Ég þurfti ekki hjálpardekk," sagði Jón Daði léttur í lund, áður en hann hrósaði Frey Alexanderssyni, Freysa, fyrir góðan taktískan undirbúning fyrir leikinn gegn Argentínu.

„Er ekki Ísland alltaf þannig, þessi litla þjóð, að við trúum á öll verkefni sem við förum í. Við erum að mæta einni af bestu fótboltaþjóðum heims og það er hægt að búast við erfiðum leik en við erum bara klárir í það."

Marcos Rojo, varnarmaður Manchester United, verður líklega í byrjunarliði Argentínu. Jón Daði er ekki smeykur og segist hlakka til að mæta stjörnum prýtt lið andstæðinganna.

„Ég veit alveg hver það er. Það skemmtilegasta sem þú gerir er að mæta þessum stóru nöfnum, öllum þessum aðalkörlum þarna."

Jón Daði finnur fyrir griðarlega miklum stuðningi að heiman og á í erfiðleikum með að svara öllum kveðjunum sem hann er að fá í aðdraganda móts.

„Mér finnst ekki erfitt að stilla spennustigið fyrir mót. Það klikkaða við þetta er hversu eðlilegt þetta er orðið, því við erum alltaf einhvern veginn í þessu strákarnir. Við erum búnir að vera í undankeppninni og spila fullt af stórleikjum þannig við erum næstum orðnir vanir, en á sama tíma gífurlega spenntir.

„Auðvitað er smá svona stress en það er bara gott. Þegar flautið skellur á þá er maður bara í núinu."

Opnunarleikur HM hefst í dag klukkan 15:00 þar sem Rússar mæta Sádí-Arabíu. Jón Daði komst að því að hann missir af fyrri hálfleiknum í lok viðtalsins.

„Við vitum af þessum opnunarleik og við ætlum örugglega að horfa á hann... eða, er hann í dag? Jú verður maður ekki að horfa á hann, við ætlum að reyna að ná honum.

„Ég held að Sádí-Arabía vinni. Þeir eru búnir að vera lúmskt öflugir í æfingaleikjum."