Rio Ferdinand segir John Terry hafa hegðað sér eins og fávita fyrir þremur árum þegar Terry var sakaður um kynþáttaníð í garð bróður hans, Anton Ferdinand. Enskir fjölmiðlar birtu í morgun brot úr sjálfsævisögu Rio.
Terry, fyrirliði Chelsea, var sakaður um að hafa kallað Anton „fucking black cunt" í leik QPR og Chelsea á Loftus Road og var í kjöldarið dæmdur í fjögurra leikja bann.
„Í mínum huga verður mesti fávitinn alltaf John Terry. Sem fyrirliði Englands og félagi minn í miðverðinum hefði hann getað komið í veg fyrir mikinn sársauka með því að viðurkenna strax að hafa notað orðin í hita leiksins," segir Rio.
„Ég tel ekki að Terry sé með kynþáttafordóma en hann hafi sagt þetta í hita leiksins. Ég og Anton hefðum sætt okkur við þá útskýringu en í staðinn gaf hann okkur ekki tækifæri. Hann reyndi að flýja það sem hann hafði gert."
Rio Ferdinand skýtur einnig á Ashley Cole sem mætti sem vitni í málinu og varði Terry.
„Ashley Cole var lengi vinur minn. Við höfum þekkt hvorn annan síðan við vorum guttar. En í mínum huga lauk þessu daginn sem hann fór í réttarsalinn til að styðja John Terry. Anton hringdi í mig og ég brjálaðist. Hann var að svíkja Anton sem hann hafði einnig þekkt lengi," segir Rio.
Málið hafði einnig áhrif á fjölskyldu þeirra bræðra.
„Það komu byssukúlur inn um bréfalúguna. Gluggi á húsi móður minnar var brotinn og hún endaði á sjúkrahúsi vegna streitu."
Athugasemdir