Þessi öflugi miðvörður er 28 ára og er lykilmaður hjá Norrköping í Svíþjóð.

„Það er mjög spennandi að fá alvöru leik. Vonandi mun ég nýta tækifærið vel," sagði Jón Guðni í samtali við Fótbolta.net í vikunni en þá var ekki búið að skoða lið Katar ítarlega.

Norrköping endaði í sjötta sæti í sænsku deildinni á liðnu tímabili.

„Það er allt í lagi miðað við það sem hafði gengið á þetta tímabilið. Við höfum selt mikið og það eru ekki margir leikmenn eftir frá því að ég kom. Það hafa ungir leikmenn komið inn, það var skipt um þjálfara á miðju tímabili og um leikkerfi. Í heildina litið er þetta á pari held ég."

„Við erum búnir að breyta í þriggja manna vörn en flest liðin í Svíþjóð eru komin í það í dag og við fylgjum straumnum. Ég fíla betur þegar það eru tveir hafsentar. Þegar það eru þrír í línu er meiri hætta á samskiptaörðugleikum og svoleiðis."

Jón Guðni hefur spilað í Svíþjóð í fimm ár og líður vel í landinu.

„Mér líður mjög vel. Þegar ég kom þangað var ekki planið að vera svona lengi en mér hefur gengið mjög vel. Svo er maður ekki einn í þessu, ég er með þrjú börn og það þarf að hugsa út í það líka. Fjölskyldunni líður mjög vel þarna og allt í toppstandi. Auðvitað vill maður komast eitthvað hærra en maður þarf að bíða og sjá hvað kemur upp."