Þrír leikir voru á dagskrá í sænsku úrvalsdeildinni í dag, Allsvenskan. Nokkur Íslendingalið spiluðu og var gengi þeirra misjafnt.

Haukur Heiðar Hauksson sat allan tímann á varamannabekk AIK þegar liðið vann öruggan 2-0 sigur á Djurgården á heimavelli í dag þar sem gestirnir enduðu með tíu menn inn á eftir að Yura Movsisyan fékk rautt spjald undir lokin.

Íslendingarnir, Jón Guðni Fjóluson og Guðmundur Þórarinsson léku allan tímann í liði Norrköping í dag er liðið lék gegn Kalmar. Norrköping sigraði leikinn 3-1 eftir að hafa lent undir eftir tæplega tíu mínútna leik.

Elías Már Ómarsson byrjaði inn á með liði sínu, IFK Gautaborg, í leik liðsins gegn Östersunds, sem lék gegn Arsenal í Evrópudeildinni í vetur, og spilaði hann 63 mínútur.

Hann náði ekki að setja mark sitt á leikinn en Östersunds vann leikinn 2-1 eftir að hafa komist í 2-0.

Eftir þessa leiki eru AIK og Norrköping á toppi deildarinnar með 7 stig eftir þrjá leiki. Gautaborg er um miðja deild með einn sigur úr þremur leikjum.