Heimild: mbl.is
„Það sem er áhugavert fyrir þetta mót núna er að það hafa aldrei jafn margir aðilar frumgert langar sjónvarpsauglýsingar fyrir nokkurn sjónvarpsviðburð," segir Einar Logi Vignisson, auglýsingastjóri RÚV, í viðtali við mbl.is.
Sekúndan í auglýsingahléi á RÚV í leik Íslands og Argentínu á morgun er sú dýrasta frá upphafi að nafnvirði.
Hver sekúnda kostar 18.000 krónur. Miðað við þetta verð myndi ein birting á nýrri 100 sekúndna HM auglýsingu Coca-Cola á Íslandi kosta 1,8 milljónir króna.
Auglýsingatímar í hálfleik í leikjum Íslands eru uppseldir.
„Menn eru nánast ekkert að spá í aðra leiki, eins og leiki enska landsliðsins, sem oft er mikil eftirspurn eftir. Öll athyglin er á leiki Íslands og svo aðra leiki í riðlinum sem Ísland leikur í," segir Einar við Viðskipta-Moggann.
Neysluvenjur breytast þegar stórmót í fótbolta fer fram og sala á gosi, snakki, bjór, grillkjöti, sjónvörpum og sófum er dæmi þar um eins og Einar talar um í viðtalinu.
Athugasemdir