„Undirbúningurinn fyrir alvöru hófst þegar liðið tryggði sér sæti á EM í haust. Veturinn fór í að undirbúa liðið og allt í kringum þetta og stilla saman strengi," sagði GunnInga sem hefur farið á báðar lokakeppninnar sem íslenska kvennalandsliðið hefur tekið þátt í. Fyrst í Finnlandi árið 2009 og svo í Svíþjóð ári síðar.

„Maður sér hvernig allt í kringum þetta stækkar. Bæði hefur verið liðum í keppninni verið fjölgað og síðan hefur faglega umgjörðin orðið meiri. Núna erum við með okkar eigin æfingavöll og þetta helst allt í hendur. Það er orðin meiri gæði í knattspyrnunni og þetta helst í hendur," sagði Guðrún Inga en til að mynda í Svíþjóð árið 2013 þá æfði íslenska landsliðið á hinum og þessum æfingavöllum.

En er KSÍ að taka stærra skref í ár en önnur knattspyrnusambönd á mótinu?

„Ég get ekki svarað fyrir aðrar þjóðir og hef ekki borið það saman. En ég get talað fyrir okkar hönd. Við höfum stígið og tekið mörg skref, bæði aðbúnað í kringum liðið, fjölgun starfsmanna og margt annað. Það er frábært að við séum komin á þennan stað. Það er alltaf hægt að gera gott betur og ég held að allir séu sáttir með þetta," sagði GunnInga sem segir að EM í Frakklandi í fyrra hjá strákunum hafi hjálpað KSÍ í undirbúningnum í ár.

„Þetta helst allt í hendur og hjálpar til. Árangur strákana á EM í fyrra sameinaði þjóðina og það heldur bara áfram. Eins og einhver sagði, "Partý-ið heldur áfram í sumar" - Auðvitað hjálpar þetta allt saman og ég fagna því. Við erum öll í sama liði, sama hvort við séum strákar eða stelpur. Við erum Ísland og allir hjá KSÍ vinna jafn mikið fyrir stráka og stelpur. Þetta er ein stór liðsheild."

„Við erum hátt í 20 starfsmenn sem verður hérna úti með liðinu. Einhverjir koma og fara og vaktaskipti hjá læknunum og öryggisstjórunum og annað," sagði Guðrún Inga en er það mikil fjölgun frá síðustu mótum?

„Við höfum bætt í frá síðasta móti. Við erum til dæmis með þrjá sjúkraþjálfara núna, það voru tveir 2013 og einn árið 2009 í Finnlandi. Leikmennirnir eru 23 og það þarf að sinna hverjum og einum vel til þess að halda leikmönnunum heilum. Það er stutt á milli leikja og það þarf að hlúa að þeim, þetta er mikið álag. Þetta er það sem við töldum að væri best fyrir liðið. Við erum einnig með fitness-þjálfara sem er mjög góð viðbót. Ég get sagt að við hjá KSÍ höfum gert allt sem við gátum gert og erum tilbúin til að gera til að undirbúa liðið og halda sem best utan um það. Ég er mjög sátt. Þegar ég vaknaði í morgun í Hollandi, þá sagði ég bara "Yes, loksins er komið að þessu." - Það var mikill fiðringur í fólki í gær og í morgun þegar við vöknuðum. Núna eru allir einbeittir og það er stutt í fyrsta leik og markmiðin eru skýr," sagði Guðrún Inga Sívertsen eða GunnInga eins og hún er kölluð að lokum.

Viðtalið í heild sinni má sjá í sjónvarpinu hér að ofan.