Heimild: mbl.is
Geir Þorsteinsson, fyrrverandi formaður KSÍ, hefur ritað pistil og sent mbl.is þar sem hann svarar ummælum landsliðsþjálfarans Heimis Hallgrímssonar sem telur að Geir hafi farið á bak við sig.
Heimir sagði í viðtali við 433 og DV að hann hefði íhugað að hætta sem landsliðsþjálfari Íslands eftir EM ef KSÍ hefði framlengt samning sinn við Lars Lagerback.
Hann segist telja að Geir hafi farið á bak við sig með því að ræða við Lagerback um að halda áfram.
„Í viðtali í DV segir Heimir að ég hafi farið á bak við sig í störfum mínum fyrir KSÍ. Þetta er rangt," segir Geir í pistlinum á mbl en hann er augljóslega ekki sáttur við orð landsliðsþjálfarans.
„Ég lít stoltur til baka og minnist þess þegar ég hafði samband við Heimi Hallgrímsson knattspyrnuþjálfara og bauð honum að koma til starfa fyrir KSÍ. Þá hafði enginn – ég ítreka enginn – stungið upp á Heimi til þeirra starfa fyrir KSÍ. Ég sá að þar fór sómamaður, efnilegur og metnaðarfullur þjálfari."
„Í störfum mínum innan knattspyrnuhreyfingarinnar kom ég ávallt fram af heiðarleika. Hið rétta er að KSÍ samdi við Heimi um að taka við landsliðinu að lokinni úrslitakeppni EM 2016. Ekkert í þeim samningi kom í veg fyrir að ég ræddi við Lars Lagerbäck um hvort hann hefði áhuga á að halda áfram eftir úrslitakeppni EM 2016. KSÍ bar ekki að leita samþykkis Heimis en ég gerði mér fyllilega grein fyrir því hver vilji hans var enda skjalfast. Áhugi KSÍ að hafa Lars áfram í starfi kom fram á opinberum vettvangi og var öllum ljós. Aldrei kom til samningsviðræðna við Lars því hann ákvað að láta staðar numið," segir Geir.
„Ræða má ef og hefði. Ef Lars hefði viljað halda áfram, hefði KSÍ orðið að óska eftir breytingum á samningi sínum við Heimi ella greiða umsamdar bætur. Til þess kom hins vegar aldrei og KSÍ hefur í einu og öllu staðið við sinn samning við Heimi. Rétt er að Heimir var ósáttur við þessa atburðarás og tjáði mér það. Hins vegar er það svo að stjórnun KSÍ er í höndum stjórnar og ársþings. Oft er reynt að verða við óskum þjálfara landsliða en það er engu að síður stjórn KSÍ sem gætir heildarhagsmuna sambandsins."
„Það að Heimir hafi verið ósáttur við mín vinnubrögð í þessu máli skil ég – en ég fór að vilja KSÍ í málinu og á bakvið Heimi fór ég aldrei. Mitt ráð til hans og þeirra sem njóta nú þess mikla afreks að Ísland er komið á HM, er að koma fram af auðmýkt og þakklæti. Við stöndum nú öll á öxlum risa sem eru störf og afrek þeirra sem á undan okkur gengu í knattspyrnuhreyfingunni.“
Í pistlinum óskar hann leikmönnum, þjálfurum og öllum sem lögðu hönd á plóg við að koma Íslandi á HM til hamingju með árangurinn.
Athugasemdir