„Við erum ánægðir með þennan leik. Þeir stilltu upp sínu sterkasta liði sem tapaði 1-0 gegn Slóveníu fyrir fjórum dögum. Þetta eru flottir andstæðingar, vel spilandi og teknískir strákar. Við erum ánægðir með útkomuna í dag," sagði Heimir Hallgrímsson landsliðsþjálfari Íslands eftir 2-0 sigurinn á Möltu í vináttulandsleik ytra í kvöld.
Lestu um leikinn: Ísland 2 - 0 Malta
„Það var fínt skipulag á liðinu okkar, þrátt fyrir að þarna væru leikmenn að spila saman sem hafa ekkert spilað saman. Það tekur oft tíma að slípa svoleiðis saman. Ég er ánægður með það og við héldum skipulagi og sköpuðum okkur fín færi. ég er ánægður með þá sem spiluðu sína fyrstu leiki," hélt hann áfram.
„Það er ofboðslega jákvætt að geta lokað árinu með góðum sigri og að halda hreinu. Þetta er endasetningin á frábæru ári hjá landsliðinu. 'Árið 2016 endaði með...' Það hefði verið leiðinlegt ef það hefði verið tap í vináttuleik. Þetta er góð lokasetning. 2-0 sigur á útivelli á móti Möltu."
Arnór Ingvi Traustason og Sverrir Ingi Ingason skoruðu mörk Íslands í kvöld en báðir hafa þeir farið vel af stað með liðinu, þetta var fimmta mark Arnórs og þriðja mark Sverris.
„Þeir eru seigir bæði Arnór Ingvi og Sverrir að skora í leikjunum hjá okkur og eru með gott record. Til þess eru þessir leikir svo þeir nái að sýna hvað þeir geta og gaman þegar þeir taka tækifærið sitt."
Þetta var síðasti landsleikur landsliðsins á stærsta ári liðsins frá upphafi þar sem Evrópumótið í Frakklandi stóð uppúr. Heimir hélt áfram uppteknum hætti og grínaðist út í Sigga dúllu liðsstjóra liðsins í lokin.
„Þetta er búið að vera langt og strangt ár og álag andlega. Við vorum að taka það saman hérna staffið hjá landsliðinu að við erum búin að vera saman í 96 daga á árinu og nú er maður orðinn svolítið leiður, meira að segja á Sigga dúllu. Nei það er ekki hægt en það reynir auðvitað á og maður finnur að það er komin þreyta og sérstaklega andleg þreyta. Það er kærkomin pása framundan. Nú fæ ég að hitta fjölskylduna í smá tíma."
Athugasemdir