Sóknarmaðurinn Hólmbert Aron Friðjónsson er farinn í atvinnumennsku til Álasunds í Noregi. Það er mikill missir fyrir Stjörnuna að mati Rúnars.

„Þetta er fyrst og fremst frábært fyrir Hólmbert. Hann gerði fína hluti fyrir okkur. Vonandi gengur honum sem best þarna úti í Álasundi," sagði hann.

„Það er að sjálfsögðu missir fyrir okkur að missa leikmenn eins og Hólmbert, sem skoraði 10, 11 mörk í fyrrasumar. En það kemur maður í manns stað."

Stjarnan samdi við Guðmund Stein Hafsteinsson í síðustu viku. Hann kemur til með að fylla skarð Hólmberts að einverju leyti.

„Guðmundur skoraði átta mörk í 16 eða 17 leikjum með Víkingi Ólafsvík og við teljum að hann geti styrkt okkur og leyst Hólmbert af hólmi með sínum leik."

Valur og FH hafa farið hamförum á leikmannamarkaðnum í vetur. Á Stjarnan einhver séns í þessi lið? „Við eigum ekki séns," sagði Rúnar Páll léttur í bragði við því.

„Það er fínt hjá þeim. Það er yfirleitt þannig að okkur er spáð þokkalegu gengi og það heldur væntanlega áfram."

Viðtalið er í heild sinni hér að ofan.