Fótbolti.net heyrði orðið í Loga Ólafsson, þjálfara Víkinga, í dag en hann staðfesti að Aron Már Brynjarsson væri að æfa með liðinu og skoðað yrði í kjölfarið hvort samið yrði við hann.

Aron Már er 19 ára gamall hægri bakvörður sem hefur verið á mála hjá Malmö í Svíþjóð og spilað með yngri liðunum þar.

Hann er í U21 landsliðshópnum sem var tilkynntur í dag.

Víkingar í markvarðarleit
Þá eru Víkingar í markvarðarleit eftir að ekki náðist samkomulag við Trausta Sigurbjörnsson. Markmannsmálin eru í óvissu í Fossvoginum fyrir sumarið en Róbert Örn Óskarsson missir að minnsta kosti af byrjun tímabils vegna meiðsla.

Senegalski markvörðurinn Serigne Mor Mbay var á reynslu hjá Víkingi á dögunum en ekki hefur verið gefið neitt út með hann.

„Það er ekkert komið á hreint en við vonumst til því að gera eitthvað í því á næstu dögum," sagði Logi við Fótbolta.net, aðspurður út í markvarðarmálin.

Komnir:
Atli Hrafn Andrason frá Fulham á láni
Gunnlaugur Hlynur Birgisson frá Víkingi Ó.
Halldór Jón Sigurður Þórðarson frá Aftureldingu
Rick ten Voorde frá Hapoel Ramat Gan
Sindri Scheving frá Val
Sölvi Geir Ottesen frá Guangzhou R&F

Farnir:
Geoffrey Castillion í FH
Ívar Örn Jónsson í Val
Viktor Bjarki Arnarsson í HK