„Mjög góð byrjun,“ sagði Kristján Guðmundsson þjálfari Keflavíkur eftir leik við Þór í kvöld á Akureyri þar sem liðið hans datt út úr Lengjubikarnum, en framlengja varð leikinn eftir að hann endaði 2-2. „Við vorum komnir 2-0 yfir eftir sex mínútur og vorum með þennan leik alveg í hendi okkar, spiluðum bara mjög vel.“
Eftir innan við 20. mínútna leik fékk Halldór Kristinn Halldórsson rautt spjald eftir einhver samskipti við Atla Jens Albertsson í vörn Þórs en þetta atriði virtist mikil vendipunktur í þessum leik.
„Já, þetta var mjög athyglisverður dómur en ég sé ekki hvað gerist frekar en einhver annar. Við látum bara þarna veiða okkur í ákveðna gildru sem við eigum að forðast, það er eina sem ég les út úr því. Þetta er mjög afdrifaríkur dómur og menn þurfa að hafa sitt á hreinu þegar þeir dæma svona.“
Hrindingar voru nokkuð vinsælt umræðuefni í kringum Pepsi-deildina síðasta sumar og afar misjafnt hvort að menn telji svona lagað verðskulda rautt spjald, verðskuldaði þetta rautt spjald? „Ég get í raun ekki svarað þessu öðruvísi en að við látum veiða okkur í gildru hérna. Svona fór það og þetta skiptir miklu máli. Samt sem áður erum við inni í þessum leik allan tímann. Eina færið sem þeir fá í seinni hálfleik er eftir að þeir jafna úr vítaspyrnu eftir vafasaman dóm. Við erum þokkalega sáttir með frammistöðuna en við fáum ekkert út úr henni.“
Má búast við einhverjum breytingum eða er þetta hópurinn sem Keflavík fer með inn í Íslandsmótið?
„Þetta er hópurinn. Þetta er mjög flott lið, góður hópur og við erum alls óhræddir að fara inn í mótið með þennan mjög góða hóp“
Viðtalið má sjá í heild í sjónvarpinu að ofan.
Athugasemdir