Þórður Þórðarson, þjálfari ÍA í Pepsi-deildinni, var svekktur eftir 4-1 tap liðsins gegn Breiðablik í kvöld.
,,Mjög skrítinn leikur, óhætt að segja það. Við hættum að spila sem lið þegar Blikar jafna leikinn, mark sem kemur upp úr smá klaufamistökum í vörninni og náum ekki að hreinsa almenninlega," sagði Þórður.
,,Við höldum ekki shape-inu, förum að hlaupa út úr stöðum og opna svæði og það má ekki gegn Blikunum. Ég var virkilega ánægður fram að því, þeir börðust og spiluðu fínan fótbolta og héldum þeim niðri, svo var ekkert að frétta hjá þeim eftir 82 mínútur en leikurinn er 90 mínútur."
,,Við lögðum hann upp þannig að við ætluðum að halda okkur niðri og loka svæðum og sækja hratt þegar við átti. Mér fannst strákarnir spila vel í 82 mínútur en eins og ég segi, leikurinn er 90 mínútur."
,,Við þurfum að gera það sem við gerðum fyrstu 82 mínúturnar af leiknum. Vera duglegir, þora að spila fótbolta og halda áfram, þetta er ekkert flókið. Þetta er engin stærðfræði," sagði Þórður.
Hægt er að sjá viðtalið í heild sinni að ofan.
