„Maður er í þessu fyrir þessi augnablik. Tilfinningin eftir leik þar sem maður nær góðum úrslitum gegn góðum liðum og liðið spilar vel. Þetta er ótrúlega skemmtilegt."

Aðspurður hvort argentínska liðið hafi vanmetið það íslenska sagði Emil: „Eru ekki öll lið smá að vanmeta okkur ennþá? Mér finnst magnað að það sé ennþá í gangi en við erum bara 330 þúsund og það er alltaf pínku vanmat. Við pælum ekki í því. Við spilum á móti þessum liðum og ef það er vanmat þá er það gott fyrir okkur."

Argentína er í 5. sæti á heimslistanum og stjörnur liðsins voru pirraðar í leiknum í dag.

„Þetta gekk bara ágætlega. Ég bjóst við aðeins meiri pirring en þeir voru alveg pirraðir. Við spiluðum okkar leik og tókum tíma í allt. Þeir voru að kvarta yfir því að við vorum að eyða of löngum tíma."

Næsti leikur Íslands er á föstudag gegn Nígeríu í Volgograd. „Við gerum ekki neitt í þessari keppni með eitt stig. Við þurfum að ná góðri endurheimt og ná öðrum góðum leik," sagði Emil að lokum.