Fótbolti.net ræddi við Böðvar Böðvarsson, bakvörð FH-inga, og byrjaði á að spyrja hann hvernig hafi gengið að koma tapinu gegn ÍBV í bikarúrslitunum síðasta laugardag úr kerfinu.

„Ég er enn mjög pirraður en það verður allt gleymt á fimmtudaginn. Þetta var mjög sárt. Það pirrar okkur mest að við áttum ekki neitt skilið úr þessum leik. Við vorum ömurlegir í fyrri hálfleik, ég man ekki eftir að hafa spilað leik með FH þar sem allt liðið er svona lélegt frá fyrstu til síðustu mínútu fyrri hálfleiksins," sagði Böðvar á æfingu FH-inga.

Ljóst er að FH þarf að sýna miklu betri frammistöðu gegn Braga á fimmtudaginn til að halda sér inn í því einvígi fyrir seinni leikinn.

„Við höfum staðið okkur vel í Evrópukeppninni og kunnum að verjast. Við gerum lítið að því á Íslandi enda liggja flest liðin til baka gegn okkur. Það er öðruvísi leikplan hjá okkur á fimmtudaginn, kannski svipað plan og ÍBV gerði gegn okkur."

Böddi segist hafa trú á því að FH geti komið á óvart gegn Braga.

„Þetta er það fallega við fótboltann. Þetta eru bara tveir leikir. Ég hef fulla trú á því að við getum unnið. Við þurfum að passa upp á að þeir skori ekki hérna enda er útivallamarkareglan ömurleg. Ef við höldum þeim í núllinu hér hef ég fulla trú á því að við getum farið áfram," segir Böðvar.

„Ef við vinnum er það stærsta skref sem félagslið hefur tekið á Íslandi. Við munum leggja allt í sölurnar til að ná því."

Viðtalið er í heild í sjónvarpinu hér að ofan.