Rakel fannst fyrri hálfleikur góður í kvöld en sá seinni skrítinn
“Ég er sérstaklega ánægð með fyrri hálfleikinn. Mér fannst hann góður hjá okkur. Það komu svona pínu skrítnir kaflar í seinni hálfleik þar sem við vorum að sparka boltanum útaf og á þeirra leikmenn, svolítið skrítinn kafli. Í heildina ánægð með sigurinn auðvitað,” sagði Rakel Hönnudóttir, fyrirliði Breiðabliks, eftir tveggja marka sigur á Fylki í kvöld.
Lestu um leikinn: Fylkir 0 - 2 Breiðablik
Breiðablik er nú komið í 2. sæti deildarinnar, a.m.k. þangað til annað kvöld þegar umferðin klárast með 3 leikjum. Nú eru 5 umferðir eftir en Breiðablik á eftir að spila við liðin sem sitja nú í 3. og 4. sætinu, Stjörnuna og ÍBV. Hvernig verður framhaldið?
“Við ætlum bara að taka gömlu klisjuna: einn leik í einu. Það þýðir ekkert annað eins og staðan er núna. Við stjórnum í raun ekki ferðinni. Stjórnum bara því sem við gerum. Það er það eina sem við getum gert og ætlum að gera, hugsa um okkur og skoða svo bara töfluna í lokin”
Rakel spilaði með nokkuð áberandi umbúðir á vinstri olnboganum í kvöld og landsliðskonan Fanndís spilaði ekkert í leiknum. Hvað veldur?
“Ég og Fanndís vorum í slag,” sagði Rakel á léttu nótunum.
“Fanndís er stíf, mjög stíf, og ekkert vit í að spila svoleiðis. Ég fékk eitthvað aðeins högg á hendina, einhver pínulítil sprunga. Ekkert alvarlegt.”
Viðtalið við Rakel má sjá í heild sinni í spilaranum hér efst.
Athugasemdir
